Presidenti i SHBA-së, Donald Trump, ka deklaruar se ka braktisur idenë e një armëpushimi të menjëhershëm në Ukrainë, duke theksuar se rruga e vetme për t’i dhënë fund luftës është një marrëveshje e drejtpërdrejtë paqeje.
Deklarata e tij erdhi pas takimit treorësh me presidentin rus Vladimir Putin në Anchorage të Alaskës, dhe një bisedë të mëvonshme telefonike me presidentin ukrainas Volodymyr Zelensky, ku u përfshinë edhe disa liderë evropianë.
“Një ditë e shkëlqyer dhe shumë e suksesshme në Alaskë! Takimi me presidentin rus shkoi shumë mirë. Më vonë pata një telefonatë të gjatë me presidentin ukrainas dhe udhëheqës të ndryshëm evropianë. Të gjithë ramë dakord se mënyra më e mirë për t’i dhënë fund luftës së tmerrshme është një Marrëveshje Paqeje – jo thjesht një armëpushim që shpesh nuk është i qëndrueshëm,” shkroi Trump në “Truth Social”.
Trump konfirmoi se Zelensky do të udhëtojë në Uashington të hënën për një takim në Zyrën Ovale. “Nëse gjithçka shkon mirë, atëherë do të caktojmë një takim edhe me presidentin Putin,” tha ai.
Nga ana e tij, Zelensky konfirmoi vizitën në SHBA përmes një postimi në X, duke shprehur mirënjohjen për ftesën dhe duke nënvizuar se mbështet idenë e Trump për një takim tripalësh me Putin. “Ukraina vlerëson se çështjet kryesore mund të diskutohen në nivelin e udhëheqësve dhe një format tripalësh është i përshtatshëm për këtë,” tha Zelensky.
Presidenti ukrainas kërkoi gjithashtu përfshirjen e partnerëve evropianë, sidomos për garancitë e sigurisë. Në konsultimet e gjata me Trump u përfshinë kancelari gjerman Friedrich Merz, presidentja e Komisionit Evropian Ursula von der Leyen, presidenti francez Emmanuel Macron, kryeministri britanik Keir Starmer, kryeministrja italiane Giorgia Meloni, presidenti finlandez Alexander Stubb, presidenti polak Karol Nawrocki, si dhe sekretari i përgjithshëm i NATO-s Mark Rutte.
Megjithatë, Kremlini hodhi poshtë mundësinë e një samiti tripalësh. Këshilltari i Putinit, Yuri Ushakov, tha se “një takim i tillë nuk është diskutuar deri më tani” dhe se nuk është vendosur as data për një takim tjetër Trump–Putin.
Putini e ftoi Trump në Moskë gjatë konferencës për shtyp në fund të samitit të Alaskës, ndërsa të dy liderët pranuan se, edhe pse nuk kishte rezultate konkrete, ishin bërë hapa për të identifikuar pika të përbashkëta që mund të shërbejnë si bazë për bisedime të ardhshme.