Alban Gjidiaj, 28 vjeç nga Tropoja, i shpallur në kërkim nga SPAK dhe me urdhër-arrest të miratuar nga GJKKO, është ndaluar në Londër, por do ta ndjekë procesin e ekstradimit drejt Shqipërisë në gjendje të lirë me kusht.
Sipas dokumenteve të siguruara nga Top Channel, Gjykata e Ekstradimeve në Westminster ka vendosur ta lirojë me kusht Gjidiajn, kundrejt një garancie financiare prej 5.000 paundësh. Krahas kësaj mase, atij i është vendosur një pajisje elektronike gjurmimi në këmbë – e njohur ndryshe si “tag” ose “Rolex elektronik”.
Gjidiaj është i detyruar të paraqitet çdo të shtunë në stacionin policor të Colindale dhe nuk lejohet të ndryshojë adresën e banimit, e cila aktualisht është në rrugën Cockfosters Road, në veri të Londrës.
Seanca gjyqësore për shqyrtimin e kërkesës së drejtësisë shqiptare për ekstradimin e tij është caktuar më 4 dhe 5 dhjetor 2025.
Ai u arrestua më 30 janar 2025 në Londër, në kuadër të hetimeve të nisura nga SPAK për një rrjet kriminal që trafikonte armë nga Shqipëria drejt Mbretërisë së Bashkuar.
Ky hetim nisi pas operacionit të koduar “Inkorporimi”, të zhvilluar në gusht 2024 në Tiranë, ku u arrestuan tre persona: Adulla Hoxhaj, Bojken Turtulli dhe Rifat Avdiaj. Gjatë aksionit u sekuestruan 25 armë zjarri, qindra fishekë, paisje optike dhe lazerë për qitje në distancë, të fshehura në mobilie dhe të transportuara me furgon drejt Anglisë.
Përveç Gjidiajt, janë shpallur në kërkim edhe tre persona të tjerë, njëri prej të cilëve është arrestuar në Londër dhe tjetri në Kolumbi. Ky i fundit është Almir Gjidiaj, vëllai i Albanit, i cili po ashtu është ndaluar me qëllim ekstradimi në Shqipëri.