Një ngjarje e rëndë ka tronditur ndeshjen mes Gjilanit dhe Malishevës në futbollin kosovar. Oltion Bilalli, sulmuesi 23-vjeçar i Gjilanit, ka mbetur pa ndjenja pas një përplasjeje të fortë ajrore me portierin e Malishevës, Ilir Avdyli. Incidenti dramatik ndodhi gjatë një dueli në zonë, ku Bilalli ra në tokë pa reaguar, duke shkaktuar panik në fushë.
Lojtarët e të dy skuadrave ndërprenë menjëherë lojën dhe thirrën stafin mjekësor, ndërsa ambulanca mbërriti në fushë brenda pak minutash. Ndeshja u pezullua për rreth 15 minuta për t’i dhënë ndihmën e parë futbollistit, i cili më pas u transportua me urgjencë në QKUK në Prishtinë.
Drejtori i Emergjencës, dr. Naser Syla, konfirmoi se Bilalli ndodhet në gjendje të rëndë. Ai po trajtohet në Mjekimin Intensiv Qendror, është i intubuar dhe nën sedacion, ndërsa mjekët do të rivlerësojnë gjendjen e tij pas disa orësh për të vendosur mbi trajtimin e mëtejshëm.
Gjendja e futbollistit mbetet kritike, ndërsa komuniteti sportiv dhe tifozët janë në ankth për shëndetin e tij.