Një skandal i madh ka përfshirë futbollin anglez. David Coote, ish-gjyqtari i Premier League, 43 vjeç, është akuzuar për prodhim të një materiali të pahijshëm me një të mitur, sipas hetimeve të Policisë së Nottinghamshire, raporton BBC.
Akuza lidhet me një skedar video të rikuperuar në shkurt të këtij viti, ndërsa Coote u akuzua zyrtarisht më 12 gusht. Ai pritet të paraqitet të enjten në Gjykatën e Magjistraturës së Nottinghamit për t’u njohur me akuzat.
Coote, me origjinë nga Collingham, ishte shkarkuar nga organizata e arbitrimit PGMOL në dhjetor 2024, pas një hetimi për një video ku ai dyshohej se bëri komente përçmuese për Liverpoolin dhe ish-trajnerin e klubit, Jurgen Klopp. Për të njëjtat komente, FA kishte vendosur një pezullim tetë-javor.
Policia theksoi se Coote nuk është arrestuar, por ndodhet në liri me kusht, ndërsa akuza për prodhimin e materialit të pahijshëm përfshin veprime si shkarkimi, ndarja dhe ruajtja e materialeve që lidhen me një të mitur.