Mesfushori i kombëtares së Afrikës së Jugut dhe i klubit Mamelodi Sundowns, Jayden Adams, ka ndërruar jetë në moshën vetëm 25-vjeçare, pak javë pasi përfaqësoi vendin e tij në Kupën e Botës 2026.
Adams luajti në të tre ndeshjet e fazës së grupeve të Botërorit me Afrikën e Jugut, e cila arriti të kualifikohej për herë të parë në fazën me eliminim direkt, përpara se të eliminohej nga bashkëorganizatorët e turneut, Kanadaja, në raundin e 32-shes.
Ministri i Sportit, Arteve dhe Kulturës në Afrikën e Jugut, Gayton McKenzie, shprehu tronditjen për ndarjen nga jeta të futbollistit.
“Me trishtim të thellë dhe zemër të rënduar mësova për ndarjen nga jeta të Jayden Adams. Futbolli i Afrikës së Jugut ka humbur një nga talentet e tij më të ndritur dhe kombi ynë vajton së bashku me familjen e tij, shokët e skuadrës dhe miliona tifozë që e panë të rritej nga një talent i akademisë në një futbollist të kombëtares”, u shpreh ai.
Policia e Afrikës së Jugut ka nisur hetimet pasi trupi i një 25-vjeçari u gjet në një banesë në zonën Schotschekloof, në qendër të Kejptaunit. Shkaqet e vdekjes ende nuk janë bërë publike.
Autoritetet u kanë bërë thirrje mediave dhe publikut të shmangin spekulimet, duke respektuar privatësinë e familjes dhe klubit Mamelodi Sundowns në këtë moment të vështirë.
Adams ishte pjesë e formacionit titullar në barazimin 1-1 ndaj Republikës Çeke në fazën e grupeve, edhe pse vetëm disa orë para ndeshjes kishte mësuar për ndarjen nga jeta të gjyshes së tij.
Sindikatat e futbollistëve të Afrikës së Jugut e cilësuan vdekjen e tij si një humbje të madhe për futbollin vendas.
“Jayden sapo kishte përfaqësuar Afrikën e Jugut në Kupën e Botës 2026, duke mbajtur me krenari, guxim dhe dinjitet shpresat e një kombi të tërë”, thuhej në reagimin e tyre.
Karrierën e tij Adams e nisi te Stellenbosch FC, përpara se të transferohej te Mamelodi Sundowns në janar të vitit 2025, ku fitoi titullin kampion dhe Ligën e Kampionëve të Afrikës.
Ai ishte gjithashtu pjesë e skuadrës së Afrikës së Jugut që arriti në gjysmëfinalet e Kupës së Afrikës 2023, përpara se të merrte ftesën për Botërorin nga trajneri Hugo Broos.
Presidenti i FIFA-s, Gianni Infantino, shprehu ngushëllimet e tij për familjen, miqtë dhe bashkëlojtarët e futbollistit.
“Është jashtëzakonisht e trishtueshme të dëgjosh se mesfushori i Afrikës së Jugut, Jayden Adams, ka ndërruar jetë vetëm disa javë pasi ishte pjesë e fushatës historike të kombëtares së tij në Kupën e Botës. Ai do të mungojë shumë”, deklaroi Infantino.