Një aksident tragjik ka goditur Kinën, ku të paktën 82 persona kanë humbur jetën pas një shpërthimi të fuqishëm në një minierë qymyri në provincën Shanxi, në veri të vendit.
Sipas mediave shtetërore kineze, shpërthimi ndodhi në minierën Liushenyu të Grupit Tongzhou, ndërsa në momentin e incidentit në galeri ndodheshin 247 punëtorë. Agjencia shtetërore e lajmeve Xinhua raportoi se shpërthimi i gazit ndodhi të premten në mbrëmje, rreth orës 19:29 sipas kohës lokale.
Autoritetet kineze kanë mobilizuar dhjetëra ekipe emergjence, ndërsa operacionet e kërkim-shpëtimit vijojnë ende për nxjerrjen e minatorëve dhe verifikimin e numrit të viktimave dhe të plagosurve.
Shkaqet e shpërthimit nuk janë bërë ende të ditura, ndërsa autoritetet kanë nisur hetimet për të zbardhur rrethanat e kësaj ngjarjeje të rëndë, e cila konsiderohet një nga aksidentet më tragjike minerare të viteve të fundit në Kinë.