Një ngjarje tronditëse ka ndodhur në Londrën veriperëndimore, ku dy adoleshentë 17-vjeçarë – një djalë dhe një vajzë – janë dënuar me një vit e nëntë muaj burg secili për torturimin dhe vrasjen brutale të dy koteleve.
Sipas gjykatës britanike, kafshët u gjetën në një park në muajin maj, të lidhura me litarë, me shenja të dukshme dhune, djegie në trup dhe plagë të rënda. Në vendngjarje, policia sekuestroi thika, pajisje për djegie dhe gërshërë – të gjitha të përdorura në aktin çnjerëzor.
Të rinjtë pranuan fajësinë për posedim të një thike dhe shkaktim vuajtjesh të panevojshme ndaj kafshëve.
Gjyqtarja e qarkut, Hina Rai, e cilësoi rastin si “vrasjet më të tmerrshme ndaj kafshëve që kam parë ndonjëherë në këtë gjykatë”.
Ndërkohë, policia britanike po heton nëse ngjarja ka lidhje me një rrjet më të gjerë ndërkombëtar që shpërndan video me përmbajtje mizore ndaj maceve në internet.