Një ngjarje e rëndë ka ndodhur në Modena, ku një automjet me shpejtësi të lartë ka hyrë në një zonë të kufizuar për qarkullimin e mjeteve dhe ka përplasur një turmë këmbësorësh, duke lënë të plagosur disa persona.
Autoritetet italiane konfirmojnë se autori i dyshuar është Salim el Koudri, 31 vjeç, me origjinë marokene, i lindur në Bergamo dhe banor i provincës së Modenës. Sipas mediave italiane, ai nuk kishte precedentë penalë dhe dyshohet se ka vepruar i shtyrë nga një gjendje konflikti personal, duke pretenduar se ndihej i ngacmuar.
Nga përplasja janë plagosur rreth shtatë persona, dy prej të cilëve ndodhen në gjendje të rëndë. Raportohet se një gruaje mund t’i duhet amputimi i të dy këmbëve për shkak të dëmtimeve të rënda.
Sipas dëshmive, makina ka dalë në trotuar, ka goditur këmbësorët, një biçikletë dhe është përplasur edhe me një vitrinë dyqani. Pas incidentit, drejtuesi i mjetit ka tentuar të largohet në këmbë, ndërsa gjatë arratisjes dyshohet se ka nxjerrë edhe një thikë dhe ka sulmuar një kalimtar, përpara se të ndalohej nga qytetarët e pranishëm.
Në vendngjarje kanë mbërritur menjëherë karabinierët, policia lokale dhe shërbimet e emergjencës, përfshirë edhe helikopterë nga Bolonja dhe Pavullo.
Kryebashkiaku i qytetit Mezzetti ka falënderuar qytetarët që ndërhynë dhe ndaluan autorin, duke shmangur një tragjedi edhe më të madhe. Hetimet paraprake përjashtojnë terrorizmin, ndërsa ngjarja po trajtohet si një akt kriminal individual.
Ndërkohë, kryeministrja italiane Giorgia Meloni dhe ministri i Brendshëm Matteo Piantedosi po ndjekin nga afër zhvillimet e rastit. Dëshmitarët raportojnë se makina lëvizte me shpejtësi të lartë, deri në rreth 160 km/orë, duke shkaktuar panik dhe skena kaosi në zonë.