KLOS-Sot jemi në ditën e dyta nga nisja e vitit të ri shkollor, por dhjetëra nxënës kanë mbetur ende pa një shkollë dhe ambientet e përshtatshme për të zhvilluaar mësimin.
Në fshatin Kurdari të Njësisë Administrative Suç në Bashkinë e Klosit, nxënësit e klasës së parë dhe të katërt të shkollës 9-vjeçare “Ibrahim Temo” prej dy ditësh kanë bojkotuar mësimin.
Mësohet se shkak për këtë bojkot bëhet bashkimi i këtyre klasave në një klasë kolektive. Janë prindërit dhe gjyshërit e nxënësve kërkojnë që mësimi të bëhet si vitin e kaluar ku secila klasë të ketë mësuesin e tij.
Prindërit do të vijojnë protestën dhe bojkotin e mësimit deri sa kërkesa e tyre të merret parasysh.
Ndërkohë për këtë problematikë, drejtues të ZVA Klos deklaruan se problemi po shqyrtohet, ndërsa shkak për bashkimin e klasave është bërë ulja e numrit të nxënësve.
Gjithashtu një tjetër problem përveç bashkimit të klasave në kolektive, prindërit ngrejnë shqetësimin edhe për kushtet në këtë godinë arsimore pasi sipas tyre është bërë vetëm lyerja në pjesën e jashtme të godinës dhe asnjë rikonstruksion brenda.
Kujtojmë se një problematikë me godinat e shkollave kishte edhe në Velipojë, ku të paktën 10 nxënës nuk e nisën vitin e ri shkollor si bashkëmoshatarët e tyre.