Një incident është regjistruar mbrëmjen e së mërkurës në Golem, ku një 38-vjeçar, i cili ishte me masë sigurie “Arrest në shtëpi”, është konstatuar nga policia duke lëvizur i lirë në rrugë dhe më pas ka kundërshtuar me forcë efektivët.
Sipas njoftimit zyrtar, rreth orës 19:10, patrulla e Postës së Policisë Golem, gjatë patrullimit në territor, ka ndaluar për verifikim shtetasin A. B., i cili njihej si person me masë sigurie për veprën penale “Shkatërrimi i pronës me zjarr”. Ai ishte i shoqëruar nga familjarë të tjerë në momentin e konstatimit.
Gjatë verifikimit, punonjësit e policisë i kanë kërkuar shpjegime për thyerjen e masës së sigurisë dhe i kanë komunikuar se do të shoqërohej në ambientet e Komisariatit të Policisë Kavajë për veprime të mëtejshme.
Në këtë moment, 38-vjeçari dhe kunati i tij, A. Sh., 23 vjeç, kanë kundërshtuar me forcë shërbimet e policisë, të ndihmuar edhe nga persona të tjerë, familjarë të tyre. Për shkak të situatës së tensionuar, një punonjës policie, me detyrë Ndihmësspecialist në Postën e Policisë Golem, ka qëlluar një herë në ajër me armën e shërbimit, me qëllim zbrapsjen e tyre.
Në ndihmë të patrullës kanë mbërritur edhe shërbime të tjera policore, të cilat kanë bërë të mundur shoqërimin e të gjithë personave të përfshirë në kundërshtimin e policisë, si dhe të 38-vjeçarit që kishte thyer masën e sigurisë.
Veprimet hetimore për rastin po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës, ndërsa për ngjarjen është njoftuar edhe Agjencia e Mbikëqyrjes Policore.
Njoftimi i policisë:
Rreth orës 19:10, Patrulla e Përgjithshme e Postës së Policisë Golem, bashkë me Ndihmësspecialistin e zonës që ishte i gatshëm, gjatë patrullimit në territor, në Golem, kanë konstatuar në rrugë shtetasin A. B., 38 vjeç, i cili ishte i shoqëruar me persona të tjerë, dhe e kanë ndaluar për verifikim, pasi njihej nga Policia që ishte me masë sigurie “Arrest në shtëpi” për veprën penale “Shkatërrimi i pronës me zjarr”.
Punonjësit e Policisë, gjatë verifikimit, i kanë kërkuar arsyen e thyerjes së masës së sigurisë dhe i kanë komunikuar se do të shoqërohej në ambientet e Komisariatit të Policisë Kavajë për veprime të mëtejshme.
Shtetasi A. B. dhe kunati i tij, shtetasi A. Sh., 23 vjeç, kanë kundërshtuar me forcë shërbimet e Policisë, të ndihmuar edhe nga persona të tjerë, familjarë të tij.
Punonjësi i Policisë me detyrë Ndihmësspecialist në Postën e Policisë Golem ka qëlluar me armën e shërbimit, pistoletë, një herë në ajër, me qëllim zbrapsjen e tyre.
Në ndihmë të punonjësve të Policisë kanë shkuar shërbime të tjera policore, të cilat kanë bërë shoqërimin e shtetasve të përfshirë në kundërshtim të veprimeve të Policisë.
Gjithashtu, është shoqëruar në Komisariat edhe shtetasi A. B., i cili kishte thyer masën e sigurisë.
Veprimet hetimore për këtë rast po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës.
Ndërkohë, është njoftuar edhe Agjencia e Mbikëqyrjes Policore për rastin.