Është thelluar bilanci tragjik i ngjarjes së rëndë që tronditi mëngjesin e së premtes fshatin Vidhisht, në Fier. Pas disa orësh në sallën e operacionit, Belere Plaka nuk ka mundur t’u mbijetojë plagëve të marra dhe ka ndërruar jetë në Spitalin Rajonal të Fierit.
Ngjarja ndodhi në orët e para të mëngjesit, kur Nertil Buzi, 35 vjeç, dyshohet se pas një konflikti vrau ish-vjehrrin e tij, plagosi rëndë ish-vjehrrën dhe më pas rrëmbeu ish-të fejuarën.
Pas alarmit, në zonë mbërritën forcat speciale RENEA, të cilat, së bashku me efektivët e Drejtorisë Vendore të Policisë Fier, nisën negociatat me autorin.
Sipas informacioneve, fillimisht 35-vjeçari liroi ish-të fejuarën, ndërsa më pas kërcënoi se do t’i jepte fund jetës. Pavarësisht rreth nëntë orëve negociata me autoritetet, ai nuk pranoi të dorëzohej dhe u vetëvra me të njëjtën armë që dyshohet se përdori për të kryer krimin.
Pas ngjarjes reaguan edhe prindërit e Nertil Buzit, të cilët deklaruan se në zanafillë të konfliktit kishte qenë një shumë e konsiderueshme parash.
Ndërkohë, emri i Nertil Buzit është përmendur edhe më herët në një ngjarje të ndodhur në Mbretërinë e Bashkuar. Sipas raportimeve, në vitin 2022 ai u mbajt peng për 12 ditë në Londër, ndërsa rrëmbyesit i kërkuan familjes së tij 400 mijë paund në këmbim të lirimit.