Ish-presidenti i Kosovës, Hashim Thaçi, ka dhënë një intervistë për gazetën gjermane Frankfurter Allgemeine Zeitung, ku ka folur për paraburgimin në Hagë, procesin gjyqësor dhe të ardhmen e tij politike.
Thaçi, i cili ndodhet prej gjashtë vitesh në paraburgim në Haga, deklaroi se nuk e sheh më veten si pjesë të garës politike, por theksoi se nuk largohet plotësisht nga jeta publike.
“E shoh garën politike pas vetes, por jo jetën time politike. Si qytetar i lirë i Kosovës do të vazhdoj t’i shërbej vendit”, u shpreh ai.
Ai foli edhe për dhimbjen personale të humbjes së babait, duke theksuar se mungesa në varrim ka qenë një nga momentet më të vështira të jetës së tij.
Në intervistë, Thaçi u ndal edhe te procesi gjyqësor, duke mbështetur qëndrimin e mbrojtjes së tij se struktura e UÇK-së nuk kishte zinxhir të qartë komandues, duke e bërë sipas tij të vështirë atribuimin e përgjegjësisë për veprime individuale.
Ai theksoi gjithashtu se pretendimet fillestare për trafikim organesh nuk janë pjesë e aktakuzës aktuale dhe shprehu shqetësim se procesi mund të ndikojë në perceptimin historik të luftës në Kosovë.
Thaçi e cilësoi ndërhyrjen e NATO në vitin 1999 si vendimtare dhe të drejtë, ndërsa theksoi se qëllimi i tij politik ka qenë gjithmonë arritja e një marrëveshjeje përfundimtare me Serbinë me njohje reciproke.
Ai nënvizoi gjithashtu rëndësinë e bashkëpunimit me Bashkimi Evropian dhe Shtetet e Bashkuara të Amerikës, duke shprehur shqetësim për mungesën e progresit në procesin e dialogut në vitet e fundit.
Në fund, FAZ thekson se procesi ndaj Thaçit dhe të tjerëve mbetet një nga rastet më të rëndësishme për drejtësinë ndërkombëtare dhe interpretimin historik të luftës në Kosovë.