Japonia është tronditur pasditen e sotme nga një tërmet i fuqishëm me magnitudë 7.2 të shkallës Rihter, i regjistruar në prefekturën Aomori, në veriun e vendit. Fillimisht lëkundjet u raportuan me magnitudë 6.7, por autoritetet më vonë konfirmuan se forca reale e tërmetit ishte edhe më e lartë.
Menjëherë pas goditjes, autoritetet japoneze lëshuan alarmin për tsunami, duke paralajmëruar për valë potencialisht deri në tre metra në tre prefektura: Aomori, Hokkaido dhe Iwate. Banorëve të zonave bregdetare u kërkua të largoheshin urgjentisht nga shtëpitë dhe të zhvendoseshin në zona më të larta.
Ndërsa informacionet e para flasin për panik të madh mes qytetarëve, deri tani nuk raportohet për viktima apo dëme materiale, ndërsa ekipet po mbledhin të dhënat zyrtare. Në disa raportime fillestare u përmend madje një magnitudë deri në 7.6, duke rritur edhe më shumë ankthin te popullata.
Autoritetet mbeten në gatishmëri të plotë dhe vijojnë monitorimin e situatës, ndërsa paralajmërimi për tsunami mbetet ende në fuqi.