Procesi i numërimit të votave për kandidatët me listë të hapur në qarkun e Gjirokastrës ka dhënë një rezultat të bujshëm: Tërmet Peçi siguron mandatin e deputetit, ndërsa Arben Ristani, ish-kreu i KQZ-së dhe një nga figurat me peshë në PD, mbetet jashtë Kuvendit.
Gjirokastra i dha 3 mandate Partisë Socialiste dhe vetëm 1 Partisë Demokratike në zgjedhjet e 2025-ës. Nga numërimi i 197 prej 198 kutive të votimit, është e qartë se dy mandatet e PS-së nga lista e hapur shkojnë për Tërmet Peçin (9458 vota preferenciale) dhe Piro Dhimën (6902 vota).
Nga ana tjetër, Partia Demokratike nuk arriti të sigurojë asnjë mandat për kandidatët e saj të listës së hapur në këtë qark, çka përjashton automatikisht nga Kuvendi Arben Ristanin, i cili shpresonte për një rikthim në jetën parlamentare.
Ky rezultat përforcon ndikimin lokal të Tërmet Peçit, ndërsa nxjerr në pah dobësinë strukturore të PD-së në jug të vendit, në një zgjedhje ku vota preferenciale ka ndikuar drejtpërdrejt formësimin e përfaqësimit parlamentar.