Shërbimet e Komisariatit të Policisë Durrës intervenuan menjëherë pas njoftimit për një rast dhune në familje në lagjen nr. 17, duke parandaluar përshkallëzimin e ngjarjes me pasoja të rënda.
Në bashkëpunim me Specialistët për Hetimin e Krimeve ndaj Personit në Drejtorinë Vendore të Policisë Durrës, u arrestua në flagrancë A. R., 76 vjeç, i dyshuar për dhunë ndaj bashkëshortes së tij.
Hetimet paraprake tregojnë se gjatë një konflikti për motive të dobëta, ai ka goditur me send të fortë (shkop druri) në kokë bashkëshorten e tij, F. D., 70 vjeçe, duke i shkaktuar dëmtime të rënda. Ndërhyrja e shpejtë e policisë parandaloi pasoja më të rënda për jetën e viktimës.
70-vjeçarja u transportua menjëherë në Spitalin e Traumës Tiranë për ndihmë mjekësore.
Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes.