Arrestohet 17-vjeçari nga Lezha, akuzohet për tentativë vrasjeje pas një konflikti për motive të dobëta
Një 17-vjeçar nga Lezha është arrestuar nga policia, pas disa muajsh në kërkim, nën akuzën e tentativës për vrasje. I mituri dyshohet se pas një konflikti për motive të dobëta, goditi me sende të forta dhe më pas e përplasi me makinë një 34-vjeçar.
Sipas policisë, ngjarja ka ndodhur më 11 prill 2025, ku janë përfshirë gjashtë persona. Pas hetimeve, rezultoi se 17-vjeçari drejtonte automjetin pa leje drejtimi dhe e përplasi qëllimisht shtetasin F. Gj., 34 vjeç.
“Forcat e Policisë së Lezhës, në bazë të kontrolleve dhe informacionit të grumbulluar, arritën të lokalizojnë dhe ndalojnë shtetasin A.M., 17 vjeç, banues në Lezhë, i shpallur më herët në kërkim për veprat penale ‘Vrasja me dashje’, mbetur në tentativë, kryer në bashkëpunim, si dhe ‘Drejtim i mjetit në mënyrë të parregullt’,” thuhet në njoftimin zyrtar.
Vijon puna për identifikimin dhe kapjen e personave të tjerë të përfshirë në konflikt, ndërsa materialet procedurale i janë referuar Prokurorisë së Lezhës për veprime të mëtejshme.