Një raport paraprak ka hedhur dritë mbi motivet e personit të akuzuar për tentativë vrasjeje ndaj Donald Trump gjatë darkës së Shoqata e Korrespondentëve të Shtëpisë së Bardhë.
Sipas analizës së përgatitur nga Departamenti i Sigurisë Kombëtare i SHBA, i dyshuari Cole Thomas Allen, 31 vjeç, mund të jetë nxitur pjesërisht nga qëndrimet e tij ndaj konfliktit mes SHBA dhe Iran. Raporti, i datës 27 prill, sugjeron se lufta disa mujore me Iranin mund të ketë ndikuar në vendimin e tij për të kryer sulmin.
Hetimet tregojnë se Allen kishte shprehur kritika të forta ndaj politikave të administratës Trump në rrjetet sociale. Një manifest prej rreth 1000 fjalësh, i shkruar para ngjarjes, zbulon se ai synonte të vriste presidentin dhe anëtarë të kabinetit të tij, ndërsa përjashtonte nga shënjestra drejtuesin e FBI, Kash Patel, si dhe të pranishmit që nuk do të ndërhynin.
Prokurorët theksojnë se i dyshuari kundërshtonte ashpër politikat e qeverisë dhe synonte të “kundërsulmonte” vendime që i konsideronte të papranueshme moralisht. Ai përballet me akuza të rënda, përfshirë tentativë vrasjeje të presidentit, përdorim të armës së zjarrit në një krim të dhunshëm dhe transport të paligjshëm të armëve.
Sipas autoriteteve, Allen ka qëlluar edhe ndaj një agjenti të Shërbimit Sekret gjatë përpjekjes për të depërtuar në zonën e sigurisë së eventit. Ndërkohë, hetuesit po analizojnë aktivitetin e tij në platforma si Bluesky, ku ai kishte publikuar mesazhe kundër Trump, Elon Musk dhe politikave ndërkombëtare.
Gjatë seancave gjyqësore, gjykatësi federal Zia Faruqui kritikoi mënyrën e trajtimit të të pandehurit në paraburgim, duke e cilësuar shqetësuese vendosjen e tij në kushte të ashpra, pavarësisht mungesës së precedentëve penalë. Ai kërkoi shpjegime nga autoritetet e burgut në Uashington DC dhe rishikim të kushteve të ndalimit.