Tensionet ushtarake midis Shteteve të Bashkuara dhe Venezuelës janë rritur ndjeshëm pasi pesë avionë luftarakë amerikanë F-35 zbarkuan në ish-bazën Roosevelt Roads në Ceiba, Porto Riko. Lëvizja u raportua nga Reuters si pjesë e një operacioni të urdhëruar nga presidenti Donald Trump për të forcuar luftën kundër trafikimit të drogës në Karaibe.
Sipas mediave ndërkombëtare, në bazë u panë gjithashtu helikopterë, anije të tipit Osprey dhe trupa ushtarake, gjë që shkaktoi protesta nga banorët vendas të cilët e kundërshtojnë militarizimin e Porto Rikos.
Vendimi erdhi vetëm disa ditë pasi SHBA njoftoi se kishte goditur një anije që transportonte drogë në Karaibe, të lidhur me bandën venezueliane “Tren de Aragua”. Njëkohësisht, Sekretari i Mbrojtjes, Pete Hegseth, bëri një vizitë të papritur në Porto Riko për të inspektuar operacionet.
Nga ana tjetër, Venezuela reagoi ashpër duke akuzuar SHBA-në për shkelje të sovranitetit, pasi sipas autoriteteve në Karakas, një shkatërrues i Marinës amerikane kishte ndërhyrë “në mënyrë të paligjshme” në ujërat e saj territoriale.
Presidenti Nicolas Maduro ndërkohë ka mobilizuar forcat e armatosura për të mbrojtur vijën bregdetare të vendit përgjatë 284 “fronteve të betejës”, duke e cilësuar këtë një masë të domosdoshme për ruajtjen e sovranitetit përballë presioni9t amerikan.
Ky përshkallëzim vjen në një periudhë kur Uashingtoni e ka bërë të qartë se objektivi kryesor mbetet goditja e organizatave kriminale me bazë në Venezuelë, por lëvizjet ushtarake kanë rritur shqetësimet për një krizë të re në rajon.