Babai i 26-vjeçarit Martin Çeço ka reaguar me indinjatë pas vendimit të Gjykatës së Apelit në Tiranë, e cila vendosi masën “arrest shtëpie” për tre të dyshuarit për vrasjen e të birit.
I tronditur dhe i zhgënjyer, ai u shpreh për mediat se ndihet i braktisur nga drejtësia dhe se familja e tij po përballet me një dhimbje të pandërprerë që prej qershorit 2022, kur ndodhi krimi.
“Për mua, arresti shtëpiak është njësoj si lirim,” deklaroi ai, duke theksuar se pas më shumë se tre vitesh pritje nuk sheh ende një zgjidhje që t’i japë fund vuajtjes së familjes. “Unë do t’i djeg, do t’i përvëloj me benzinë. Mua s’më dhimbset jeta fare. Unë nuk i lë. Do t’i djeg me benzinë, djali im shkoi”, tha babai i viktimës.
Në reagimin e tij publik, babai i viktimës përdori gjuhë shumë të ashpër dhe emocionale, duke shprehur revoltë të thellë ndaj vendimit të gjykatës dhe duke thënë se ndjen se drejtësia po dështon të ndëshkojë autorët e dyshuar të krimit. Ai kërkoi që ndaj tyre të rikthehen masa më të rënda sigurie, duke argumentuar se rreziku për arratisje dhe për pengim të hetimeve mbetet real.
Babai i Martin Çeços ngriti gjithashtu akuza ndaj të dyshuarve, duke pretenduar se ata ishin të përfshirë në veprimtari kriminale në zonën e Maliqit dhe se i biri kishte marrë kërcënime përpara se të vritej. Sipas tij, Martin Çeço nuk kishte lidhje me pistat që u përmendën gjatë hetimeve dhe nuk kishte arsye të bëhej shënjestër e një krimi kaq të rëndë.
Ai kujtoi se fillimisht çështja ishte cilësuar si vepër penale që dënohet me burgim të përjetshëm, ndërsa tani, sipas tij, vendimet e fundit po e zbehin ndjeshëm përgjegjësinë penale të të dyshuarve.
“E quajtën krim që dënohet me përjetësi, sot i shohim jashtë qelive,” përfundoi ai, duke kërkuar që drejtësia të veprojë me vendosmëri për zbardhjen dhe ndëshkimin e autorëve të vrasjes së të birit.