Pas sigurimit të një mandati në Kuvend në zgjedhjet e 11 majit, Jorida Tabaku ka reaguar përmes një mesazhi falënderues për votuesit dhe strukturat mbështetëse të Partisë Demokratike. Ajo shpreh mirënjohje për të gjithë ata që kontribuan në fushatë dhe thekson se sfida nuk ishte aspak e lehtë.
Në reagimin e saj, Tabaku i kushton vëmendje edhe rivalit të saj brenda listës, Ilir Alimehmeti, duke e përgëzuar për garën korrekte dhe qytetare.
“Përgëzime për të gjithë, veçanërisht për kolegun Alimehmeti, me të cilin ndamë sprintin e fundit të kësaj gare”, shkruan ajo.
Tabaku shprehu gjithashtu keqardhje që opozita nuk arriti të realizonte rotacionin politik të shumëpritur, duke kritikuar sistemin zgjedhor që, sipas saj, prodhoi një garë të brendshme shpesh të padrejtë.
Në fund, Tabaku falënderoi edhe familjen për mbështetjen e pandërprerë gjatë gjithë fushatës.
Postimi i Tabakut:
Falënderime pa fund për këdo që më votoi, që më mbështeti dhe që ishte me mua në këtë sfidë të radhës, e cila për të thënë të drejtën nuk ishte aspak e lehtë.
Mirënjohje çdo demokrati që punoi, trokiti në çdo derë dhe më shoqëroi në çdo ecje e në takime që nisnin në agim dhe përfundonin në mbrëmje, duke bërë të mundur që sot të kem këtë mbështetje!
U jam pafund mirënjohëse të gjithë demokratëve; anëtarëve, aktivistëve, komisionerëve, numëruesve, drejtuesve lokalë. Për lodhjen, sakrificën dhe forcën e besimit! Ju jeni Partia Demokratike! Së fundmi, falenderime nga zemra për familjen time; Saimirin dhe fëmijët, mamin, babin, Fisnikun dhe Lornën, si dhe familjen e madhe që ishte me mua deri në votën e fundit.
Fatkeqësisht nuk arritëm dot të sjellim rotacionin politik aq të nevojshëm për Shqipërinë, pasi ky sistem prodhoi edhe një garë të brendshme shpeshherë të padrejtë. Por përgëzime për të gjithë, veçanërisht për kolegun Alimehmeti, me të cilin ndamë sprintin e fundit të kësaj gare, për fushatën dhe mbi të gjitha, për qytetarinë.