Një incident i tensionuar ka ndodhur pas barazimit të javës së kaluar mes Atalanta dhe Inter, ku protagonistë janë bërë kapiteni i Shqipërisë, Berat Gjimshiti, dhe zëvendëstrajneri serb i Interit, Aleksandar Kolarov.
Sipas mediave italiane, përplasja ka ndodhur në fund të ndeshjes, në një moment tensioni ku u përfshinë disa futbollistë dhe ku situata agravoi deri në pezullimin e trajnerit të Interit, Cristiani Chivu.
Pamjet e kapura nga kamera e arbitrit dhe të shpërndara më pas në rrjet tregojnë Gjimshitin teksa i drejtohet Kolarovit me fjalët: “Eja ta zgjidhim në tunel. Eja ta provosh aty…”, duke sinjalizuar një përplasje të drejtpërdrejtë mes tyre.
Burime pranë ngjarjes bëjnë me dije se provokimi fillestar dyshohet të ketë ardhur nga Kolarov, ndërsa Gjimshiti – i njohur për qetësinë e tij në fushë – ka reaguar në këtë mënyrë në kulmin e tensionit.
Kujtohet se mbrojtësi shqiptar nuk është përfshirë më parë në episode me ngarkesë nacionaliste, madje bashkëshortja e tij është serbe, çka e bën këtë incident të shihet më shumë si një përplasje sportive sesa personale.
Megjithatë, ky nuk është rasti i parë i përplasjeve mes shqiptarëve dhe serbëve në futbollin italian. Një nga episodet më të njohura mbetet ai mes Igli Tare dhe të ndjerit Siniša Mihajlović, i cili në atë kohë bëri bujë të madhe për shkak të përplasjes fizike mes tyre.