QIPRO– Situata e sigurisë në Mesdheun Lindor është përshkallëzuar ndjeshëm pas incidenteve të fundit me dronë në Qipro, ku mesditën e sotme sirenat e alarmit u aktivizuan në bazën britanike në Akrotiri, ndërsa avionë luftarakë u ngritën menjëherë në ajër.
Sipas asaj që raportojnë mediat e huaja mësohet e radarët zbuluan objekte të dyshimta në hapësirën ajrore, duke çuar në evakuimin e aeroportit civil të Pafos. Autoritetet qipriote konfirmuan neutralizimin e dy dronëve që po drejtoheshin drejt bazave britanike, ndërsa vendi mbetet në gjendje gatishmërie të lartë.
Ndërsa më herët një mjet ajror pa pilot kishte rënë brenda zonës së instalimeve ushtarake britanike, duke shkaktuar dëme të vogla materiale. Për pasojë, Britani e Madhe vendosi largimin e familjeve të personelit ushtarak dhe zhvendosjen e përkohshme të stafit jo-thelbësor. Mes kësaj situate të tensionuar, ambasada amerikane në Nikozia lëshoi paralajmërim për qytetarët, duke kërkuar vigjilencë dhe shmangien e lëvizjeve të panevojshme. Situata aktivizoi edhe refleksin e mbrojtjes së Greqisë, e cila dërgoi dy fregata, përfshirë “Kimon”, dhe një çift avionësh F-16 për të mbështetur Qipron.
Ministri i Mbrojtjes, Nikos Dendias, theksoi se Athina do të mbështesë ishullin me çdo mjet të mundshëm.
Kryeministri grek, Kyriakos Mitsotakis, zhvilloi komunikim telefonik me presidentin e Qipros, Nikos Christodoulides, për të konfirmuar bashkëpunimin e ngushtë ndërmjet dy vendeve. Paralelisht, sektorit detar i është vënë vëmendje e shtuar, me dhjetë anije me flamur grek në Gjirin Persik dhe 85 marinarë në bord, ndërsa qeveria greke paralajmëron riatdhesimin e qytetarëve nëse situata përkeqësohet. Megjithatë situata mbetet nën vëzhgim të vazhdueshëm, ndërsa vendet e përfshira kërkojnë ruajtjen e stabilitetit dhe sigurinë e qytetarëve në rajon./Radar.al