Stuhia tropikale “Melissa” ka shkaktuar tre viktima në Haiti, ndërsa autoritetet paralajmërojnë se ajo mund të shndërrohet në uragan gjatë fundjavës, sipas Qendrës Kombëtare të Uraganeve (NHC) të SHBA-së.
Agjencia e Mbrojtjes Civile të Haitit njoftoi se dy persona kanë humbur jetën dhe një tjetër është plagosur, duke e çuar në tre numrin e viktimave të lidhura me motin e keq gjatë 48 orëve të fundit. Një prej viktimave humbi jetën të mërkurën, pasi mbi të ra një pemë për shkak të erërave të forta.
Reshjet e dendura kanë shkaktuar rritje të nivelit të lumit Saint-Martin, që solli shkatërrimin e një ure në verilindje të vendit dhe dëme të konsiderueshme në shtëpi në veriperëndim, në zonën e Port-des-Peys.
Sipas paralajmërimit të fundit të emergjencës të NHC-së, të lëshuar në orën 03:00 (me orën e Greqisë), Melissa ndodhej rreth 360 kilometra në jugperëndim të Port-au-Prince, kryeqytetit të Haitit, dhe 310 kilometra në juglindje të Kingston, kryeqytetit të Xhamajkës.
Meteorologët paralajmërojnë se brenda 48 orëve të ardhshme stuhia mund të forcohet në uragan, duke goditur Xhamajkën dhe jugperëndimin e Haitit. Edhe pse intensiteti i saj ka ndryshuar pak në orët e fundit, NHC paralajmëron për “përmbytje katastrofike dhe rrëshqitje toke” në pjesën jugore të ishullit Hispaniola dhe në Xhamajkë gjatë fundjavës.
Tropical Storm Melissa unleashes early flooding in the Dominican Republichttps://t.co/gWCIgLQRmK
— World Class Getaways (@wcgetaways) October 25, 2025