Studentët shqiptarë në Shkup dolën sot në protestë për të kërkuar mundësinë që provimin e jurisprudencës ta japin në gjuhën e tyre amtare, shqipen.
Në qendër të qytetit, ata vendosën pankarta me mbishkrime si: “Ligji në letër, diskriminim në praktikë”, duke tërhequr edhe qytetarë të tjerë në mbështetje të tyre. Protestuesit u ndalën para Ministrisë së Drejtësisë, duke kërkuar zbatim real të ligjit që garanton përdorimin e shqipes në provim.
Ky provim, i domosdoshëm për ushtrimin e profesionit juridik si avokat, gjyqtar apo prokuror, në praktikë zhvillohet kryesisht në gjuhën maqedonase, duke krijuar pengesa për studentët shqiptarë dhe kufizuar përfaqësimin e tyre në sistemin gjyqësor.
Kërkesa kryesore e studentëve është që provimi të zhvillohet plotësisht në shqip, me procedura të barabarta për të gjithë kandidatët dhe respektim të të drejtave gjuhësore të garantuara me ligj.