Një operacion i zhvilluar nga SPAK mbrëmjen e 16 janarit ka çuar në pranga 10 persona në Tiranë, mes tyre edhe një shtetas italian, gjatë kontrollit të disa call center-ave të dyshuar për mashtrim.
Gjatë aksionit, hetuesit kanë sekuestruar portofole kriptomonedhash, ndërkohë që hetimi përfshin edhe disa prova materiale që lidhen me aktivitet të dyshuar të paligjshëm.
Operacioni është zhvilluar në bashkëpunim me autoritetet italiane dhe ka përfshirë kontrollin e 6 kateve të një kulle luksoze pranë rrugës “Myslym Shyri”.
Në vijim të aksionit, dy pronarë të këtyre bizneseve janë shpallur në kërkim, ndërsa disa persona të lidhur me çështjen po merren në pyetje.
Veprimet u realizuan me vendim të Gjykatës së Posaçme Kundër Korrupsionit dhe Krimit të Organizuar (GJKKO), firmosur nga prokurori Vladimir Mara, dhe kontrolli vazhdon edhe sot, 17 janar, për mbledhjen e provave të tjera.