Prokuroria e Posaçme kundër Korrupsionit dhe Krimit të Organizuar (SPAK) ka paraqitur pretencën për tre të pandehurit e veçuar në dosjen që lidhet me ish-presidentin Ilir Meta, duke kërkuar në total 19 vite burg për Fatime Kryemadhin, Pirro Xhixhon dhe Ema Çokun. Të tre kanë zgjedhur të gjykohen me procedurën e gjykimit të shkurtuar.
Për ish-kreun e AKEP, Pirro Xhixho, i akuzuar për korrupsion pasiv të funksionarëve të lartë shtetërorë, SPAK kërkoi dënimin me 4 vite e 6 muaj burg. Në rast të pranimit të gjykimit të shkurtuar, dënimi zbret në 3 vite burg. Prokuroria ka kërkuar gjithashtu që, duke marrë parasysh moshën e tij dhe faktin se nuk rezulton të ketë përfituar personalisht nga vepra penale, dënimi me burg të konvertohet në shërbim prove.
Për Fatime Kryemadhin, e akuzuar për pastrim parash në bashkëpunim, SPAK kërkoi 7 vite e 6 muaj burg, dënim që me gjykim të shkurtuar reduktohet në 5 vite. Edhe në këtë rast, Prokuroria kërkoi pezullimin e ekzekutimit të dënimit me burg dhe vendosjen e saj në shërbim prove për 5 vjet, duke marrë në konsideratë moshën.
Ndërsa për Ema Çokun, e akuzuar gjithashtu për pastrim parash në bashkëpunim, SPAK kërkoi dënimin me 7 vite burg, i cili me gjykim të shkurtuar ulet në 4 vite e 8 muaj. Prokuroria kërkoi pezullimin e vuajtjes së dënimit me burg dhe vendosjen e saj në shërbim prove për një periudhë pesëvjeçare.
Në pretencën e saj, SPAK kërkoi gjithashtu konfiskimin e vilës në pronësi të Fatime Kryemadhit. Sipas organit të akuzës, edhe pse pasuria rezulton e justifikuar me burime të ligjshme, ajo përfaqëson vlerën ekuivalente të shumës që dyshohet se është pastruar.
Hetimet për këtë dosje u mbyllën më 28 korrik, ndërsa çështja u dërgua për gjykim në fund të muajit gusht. Dosja përfshin tre hetime të bashkuara, që lidhen me çështjen CEZ-DIA, kontratën e lobimit të ish-LSI-së në Shtetet e Bashkuara dhe hetimin pasuror.