SPAK ka goditur një grup të strukturuar kriminal të përfshirë në trafikun ndërkombëtar të lëndëve narkotike nga Amerika Latine drejt vendeve të Bashkimit Europian. Operacioni u zhvillua në katër qarqe – Tiranë, Shkodër, Vlorë dhe Elbasan – dhe çoi në arrestimin e 7 personave, ndërsa 6 të tjerë janë shpallur në kërkim.
Hetimet, të nisura që nga viti 2023, zbuluan 11 episode kriminale, përfshirë trafik droge, kalim të paligjshëm kufijsh dhe ushtrim ndikimi ndaj zyrtarëve publikë. Gjatë operacionit janë sekuestruar:
3585 kg kokainë
701 kg kanabis
4.2 kg heroinë
Po ashtu janë sekuestruar:
5 automjete luksoze (Porsche, Maserati, Audi etj.)
38,970 euro dhe 200 dollarë
Telefona të enkriptuar
Armë dhe municione
Dokumente dhe sasi droge
Një nga të arrestuarit është ish-shefi i Policisë Kriminale në Komisariatin Nr. 3 në Tiranë, i dyshuar për shpërdorim detyre dhe bashkëpunim me grupin kriminal.
Gjithashtu, përmes platformës së enkriptuar “Sky ECC”, të dyshuarit kanë komunikuar për koordinimin e trafikimit, të dhëna që janë siguruar nga autoritetet franceze në kuadër të bashkëpunimit ndërkombëtar.
Përveç ndalimeve, janë kryer edhe 12 kontrolle banesash dhe mjetesh. SPAK thekson se hetimet janë në vijim dhe priten zhvillime të tjera, ndërsa ka falënderuar për ndihmën autoritetet franceze, italiane, ekuadoriane, serbe, si dhe agjencitë Eurojust dhe Europol.