Prokuroria pranë Gjykatës së Shkallës së Parë të Juridiksionit të Përgjithshëm Tiranë ka përfunduar hetimet dhe ka dërguar për gjykim gjashtë persona, të akuzuar për falsifikim dokumentesh dhe ndihmë në kalimin e paligjshëm të kufijve, në kuadër të një skeme kriminale që synonte dërgimin e shtetasve shqiptarë drejt Shteteve të Bashkuara të Amerikës kundrejt pagesës prej 35 mijë eurosh.
Të pandehur në këtë çështje janë Hazir Maçi, Lejla Maçi, Çerkez Nikoçi, Ardjan Pirani, Alfred Maçi dhe Endrit Nezaj. Nga hetimet rezulton se Hazir Maçi, i proceduar edhe më parë për veprimtari të ngjashme, ka organizuar kalimin e disa shtetasve shqiptarë drejt SHBA-së dhe Kanadasë, përmes vendeve të Karaibeve dhe Porto Rikos, duke përdorur dokumente të falsifikuara.
Sipas Prokurorisë, Hazir Maçi dyshohet se ka falsifikuar dokumente identifikimi dhe ka ndihmuar në kalimin e paligjshëm të kufijve, duke komunikuar me bashkëpunëtorët e tij edhe nga ambientet e paraburgimit, përmes dy numrave telefonikë.
Lejla Maçi, bashkëshortja e tij, dyshohet se ka marrë pjesë aktive në organizimin e udhëtimeve, duke përfshirë edhe vëllain e saj, Ardjan Pirani, në menaxhimin e porosive për kalimet e paligjshme.
Endrit Nezaj, punonjës i një agjencie turistike, akuzohet se ka siguruar fotografi dokumentesh të shtetasve të huaj për prodhimin e dokumenteve false, ndërsa Çerkez Nikoçi, në rolin e shoferit, ka transportuar dokumente të falsifikuara.
Alfred Maçi dyshohet se ka vënë në dispozicion pasaportën e tij britanike, e cila është përdorur si model për falsifikimin e dokumenteve të tjera që shërbenin për kalime të paligjshme.
Të pandehurit do të gjykohen për veprat penale “Falsifikim i letërnjoftimeve, pasaportave ose vizave”, “Falsifikim i dokumentit” dhe “Ndihma për kalim të paligjshëm të kufijve”, ndërsa për Hazir Maçin rëndon edhe akuza e “Futjes ose mbajtjes së sendeve të ndaluara në institucionet e ekzekutimit të vendimeve me burgim”.
Materialet procedurale janë referuar pranë gjykatës për vijimin e veprimeve ligjore.