Sekretari amerikan i Mbrojtjes, Pete Hegseth, është përfshirë në një skandal të ri pas raportimeve se ka shpërndarë informacione të ndjeshme për një sulm në Jemen përmes aplikacionit të koduar Signal. Mediat amerikane raportojnë se mesazhe të ngjashme janë ndarë edhe në një bisedë private me anëtarë të familjes së tij.
Reagimi i Hegseth ishte i ashpër. Gjatë një paraqitjeje në Shtëpinë e Bardhë me rastin e Easter Egg Roll, ai akuzoi mediat dhe ish-punonjësit e Departamentit të Mbrojtjes për shpifje të qëllimshme:
“Kjo është ajo që bëjnë mediat. Marrin burime anonime, ish-punonjës të pakënaqur dhe përpiqen të prishin reputacionin e njerëzve. Por nuk do të funksionojë me mua,” deklaroi ai.
Hegseth u shpreh i vendosur për të reformuar Pentagonin dhe për t’ia kthyer “në dorë luftëtarëve të vërtetë të luftës”. Ai shtoi se veprimet e tij kanë mbështetjen e presidentit Donald Trump, me të cilin ka pasur komunikim të drejtpërdrejtë.
Ndërkohë, ish-sekretari i tij i shtypit, John Ullyot, dhe disa zyrtarë të larguar, kanë hedhur dritë mbi situatën brenda Pentagonit, duke e përshkruar si “muajin e kaosit total”, me publikime të paautorizuara, shkarkime masive dhe humbje kontrolli në menaxhimin e operacioneve.
“Presidenti meriton më mirë nga lidershipi i tij,” u shpreh Ullyot.