Skandali i lidhur me Jeffrey Epstein ka përfshirë edhe futbollin francez, pas publikimit të dokumenteve gjyqësore nga autoritetet amerikane. Në materialet e bëra publike në fillim të shkurtit nga Departamenti Amerikan i Drejtësisë, shfaqet edhe emri i ish-futbollistit të njohur francez, Franck Ribery.
Sipas dokumenteve, emri i Ribery përmendet gjashtë herë në dosjet që lidhen me hetimet ndaj biznesmenit amerikan, i cili u akuzua për krime seksuale dhe për krijimin e një rrjeti prostitucioni. Përmendja e ish-yllit të Bayern Munich nuk lidhet me ndonjë akuzë të drejtpërdrejtë, por gjendet në një deklaratë të atribuar një pale të tretë.
Në dëshminë e përfshirë në dokumente, bëhet fjalë për incidente të dhunshme dhe përmendje të një rrjeti prostitucioni, ku emri i Ribery shfaqet në kuadër të rrëfimit të dëshmitarit. Një nga pasazhet përshkruan një incident të supozuar, për të cilin thuhet se ka kërkuar ndërhyrjen e forcave të policisë.
Referencat ndaj Ribery shfaqen për herë të parë në faqen 26 të dokumenteve të aksesueshme publikisht dhe vijojnë edhe në faqe të tjera, ku përmenden elementë të tjerë të dëshmisë dhe figura të lidhura me çështjen.
Dokumentet e publikuara përfshijnë dëshmi, deklarata dhe materiale hetimore, të cilat përmbajnë akuza dhe pretendime të palëve të treta, pa përbërë domosdoshmërisht prova apo vendime gjyqësore për personat e përmendur.
