Një investigim i kryer te Spitali i Traumës ka zbuluar praktikë shqetësuese, ku disa pacientë tregojnë se kanë dhënë para për të përshpejtuar ndërhyrjet kirurgjikale.
Pacientët shprehen se pritja e gjatë i detyron ata të kërkojnë rrugë të shkurtër, veçanërisht kur dhimbja është e rëndë dhe nuk mund të zgjidhet me medikamente. Disa treguan se kishin dhënë deri në 3.500 euro cash për mjekët, për të siguruar operacionin pa pritur në listën e pritjes.
“E kemi bërë aty, tek Trauma, por e kemi bërë me pagesë, kena blerë protezën, e kupton? Ku e keni blerë? Te spitali, te Spitali i Traumës, 3.500 euro,” u shpreh një qytetar.
Gjatë bisedave me pacientët, u vu re se disa, edhe pse ndodheshin në listën e pritjes dhe kishin kartelë të hapur, kishin kryer ndërhyrjen. Kjo ngre pyetje mbi favorizimet dhe pagesat shtesë që mund të kenë bërë për të kaluar radhën.
Spitali i Traumës sqaroi se përveç urgjencave dhe listës së pritjes, ofron shërbim për pacientët që sigurojnë vetë materialet ortopedike të nevojshme. Çdo ndërhyrje dokumentohet në kartelën e pacientit dhe firmoset konsenti i informuar, ashtu si për çdo operacion tjetër.
Megjithatë, disa pacientë lanë të kuptohet se kanë pasur negociata direkte me mjekët, duke dhënë para për të përshpejtuar procesin:
“Foli djali me doktorin, por akoma nuk po e rregullojmë dot vetë njëherë, a kupton… besoj se e merr vesh.”
“Pagesën si e keni bërë? Ku e keni bërë?
Në spital?
“Po, në spital e kemi bërë cash. I ka marrë doktori, atij ia kena dhënë.”
“Herën e parë 3 mijë euro”.
Kush ua tha?
“Mjeku na tha.”