Një incident është regjistruar në spitalin rajonal të Korçës, ku roja i shërbimit në pavionin e sanatoriumit ka shkaktuar shqetësim serioz për pacientët dhe stafin mjekësor. Burime nga vendngjarja bëjnë me dije se punonjësi i sigurisë ka qenë në gjendje të dehur kur ka hyrë në pavion dhe ka filluar të ofendojë pacientët dhe familjarët e tyre.
Pasi situata u përshkallëzua, ndërhyri stafi infermieror, me të cilët roja u përfshi në një debat verbal dhe fizik. Më pas ai ka goditur një familjar të një pacienti të shtruar në pavion.
Ngjarja është referuar menjëherë policisë, e cila ndërhyri për të stabilizuar situatën dhe më pas shoqëroi rojen në komisariat për veprime të mëtejshme ligjore.