Një incident i rëndë është shënuar këtë të hënë në aeroportin e Dortmundit, ku dhjetëra pasagjerë shqiptarë janë lënë në tokë nga kompania ajrore Wizz Air, pas një rasti të qartë overbooking-u, shitjeje të biletave mbi kapacitetin e avionit.
Sipas denoncimeve të vetë qytetarëve, fluturimi W4 5126 Dortmund–Tiranë, i planifikuar për t’u nisur në orën 15:45, u vonua pasi stafi i aeroportit zbuloi se kompania kishte shitur më shumë bileta sesa numri real i vendeve në bord.
Pasagjerët shqiptarë janë përballur me një situatë kaotike dhe trajtim poshtërues, ndërsa stafi i Wizz Air u ka komunikuar se “nuk ka më vende të lira në avion”. Të mbetur në sallën e pritjes, shumë udhëtarë raportojnë se nuk u është dhënë asnjë zgjidhje konkrete për rimbursim apo akomodim, ndërsa të tjerëve u është thënë se mund të udhëtojnë vetëm të mërkurën, nëse atëherë do të ketë vende të lira.
Ky nuk është rasti i parë që Wizz Air akuzohet për abuzime të tilla. Kompania njihet për praktikën e shitjes së tepërt të biletave, me arsyetimin se një pjesë e pasagjerëve nuk paraqiten në aeroport, por kur të gjithë vijnë, shumë mbeten jashtë avionit.
Për më tepër, burime nga sektori i aviacionit raportojnë se Wizz Air po përballet me probleme serioze teknike, pasi 38 avionë të saj janë aktualisht jashtë funksioni për shkak të defekteve në motorë, çka ka sjellë vonesa dhe anulime të shumta në linjat evropiane gjatë javëve të fundit.