Pushimet morën një kthesë dramatike në Halkidiki, ku një skaf me shtatë persona në bord u përplas me një breg shkëmbor pranë ishullit Diaporos, duke shkaktuar plagosjen e tre turistëve nga Kosova.
Ngjarja ndodhi mesditën e së martës dhe ka alarmuar autoritetet portuale greke. Në mjetin lundrues ndodheshin gjashtë shtetas nga Kosova dhe një shtetas amerikan, të cilët, sipas raportimeve paraprake, ishin duke shijuar një udhëtim turistik në det.
Përplasja e fuqishme bëri që skafi të përmbysej. Tre nga pasagjerët pësuan dëmtime dhe u dërguan fillimisht në Qendrën Shëndetësore të Agios Nikolaos, më pas në Spitalin e Poligyros. Fatmirësisht, të plagosurit ndodhen jashtë rrezikut për jetën dhe janë liruar nga spitali.
Skafi dyshohet se ishte marrë me qira dhe pas aksidentit është tërhequr në breg për ekspertizë. Ndërkohë, autoritetet portuale të Ormos Panagias kanë nisur një hetim të plotë për të zbuluar shkakun e përplasjes.