Autoritetet siriane kanë arrestuar ish-drejtuesin e Qendrës për Studime dhe Kërkime Shkencore (SSRC), Ahmed Habib Ali, i akuzuar se ka mbikëqyrur programin e armëve kimike gjatë qeverisë së mëparshme.
Sipas Ministrisë së Brendshme, Ali, një ish-kolonel dhe specialist i armëve kimike, u arrestua në provincën e Latakias pas një operacioni të forcave të sigurisë. Hetimet paraprake pretendojnë se ai ka qenë përgjegjës për rezervat e gazit sarin dhe ka mbikëqyrur prodhimin e rreth 20 bombave me këtë agjent kimik, të cilat dyshohet se janë përdorur në sulme gjatë viteve 2013–2017.
Autoritetet siriane thanë se emri i tij u identifikua në dokumente të sekuestruara në objekte të lidhura me programin e armëve kimike dhe se hetimet vazhdojnë për të dokumentuar të gjitha akuzat përpara procedimit gjyqësor.
Qeveria e ish-presidentit Bashar al-Assad është akuzuar prej vitesh nga opozita dhe organizata ndërkombëtare për përdorimin e armëve kimike në sulme ndaj civilëve, akuza që janë mbështetur edhe nga gjetjet e Organizatës për Ndalimin e Armëve Kimike (OPCW), ndërsa regjimi i Assadit i ka mohuar vazhdimisht ato.