Autoriteti Kombëtar i Ushqimit (AKU) ka vendosur gjoba dhe ka depozituar kallëzim penal ndaj një subjekti në Shkodër, pasi gjatë inspektimeve u konstatuan shkelje të rënda të legjislacionit për sigurinë ushqimore.
Sipas njoftimit zyrtar, Drejtoria Rajonale e AKU-së në Qarkun Shkodër ka kallëzuar në Prokurorinë pranë Gjykatës së Shkallës së Parë të Juridiksionit të Përgjithshëm në Shkodër shoqërinë “MODI” shpk, pas verifikimeve të kryera në magazinat e saj.
Kontrollet u zhvilluan në kuadër të masave për monitorimin e importeve të misrit për ushqim kafshësh me origjinë nga Serbia, pas rasteve të përsëritura kur analizat laboratorike kishin zbuluar prani të aflatoksinës B1 mbi normat e lejuara.
Gjatë inspektimit, trupa inspektuese konstatoi sasi të konsiderueshme misri rifuxho të importuar nga Serbia, të cilat u bllokuan deri në daljen e përgjigjeve laboratorike. Por në verifikimet e mëvonshme u konstatua se shenjat e bllokimit ishin prishur dhe një pjesë e madhe e produktit ishte lëvizur nga subjekti, në kundërshtim me vendimin e inspektorëve.
Nga 104 ton misër të bllokuar, në magazinë u gjetën vetëm rreth 9.5 ton, ndërsa pjesa tjetër rezulton të jetë përdorur ose zhvendosur. Gjithashtu, një silos ku ishte bllokuar një tjetër sasi prej 26 tonësh nuk përmbante më misër, por ushqim të përpunuar për shpendë.
Analizat laboratorike konfirmuan se produkti ishte jokonform dhe i pasigurt për shkak të nivelit të lartë të aflatoksinës B1. Përfaqësuesi i subjektit deklaroi se misri ishte përdorur për ushqimin e zogjve në fermën e tij, por ky pretendim nuk u mbështet me dokumentacion dhe nuk u paraqit asnjë sistem gjurmueshmërie për destinacionin e produktit.
Për këto shkelje, AKU vendosi masa administrative me gjoba, si dhe urdhëroi bllokimin dhe asgjësimin e sasisë së mbetur të produktit, ndërsa çështja i është referuar Prokurorisë për nisjen e procedimit penal.
Sipas AKU-së, subjekti dyshohet për disa vepra penale, përfshirë prishjen e shenjave të sigurisë të vendosura nga organet shtetërore, vendosjen në qarkullim të produkteve që rrezikojnë shëndetin dhe mashtrimin me produkte ushqimore, vepra që parashikojnë dënim deri në tre vjet burg.
Autoriteti Kombëtar i Ushqimit thekson se kontrollet do të vijojnë në të gjithë vendin dhe çdo shkelje e ligjit për sigurinë ushqimore do të ndëshkohet sipas legjislacionit në fuqi.