Të gjitha ato biznese që kërkojnë të punësojnë staf të huaj tashmë është dhënë mundësia që të aplikojnë në “e-Albania”.
Lajmi u njoftua ditën e djeshme nga ministri i Ekonomisë, Kulturës dhe Inovacionit, Blendi Gonxhja, i cili u shpreh se dy shërbime të reja ofrohen në platformën “e-Albania”, për paketën e “Lejes Unike”.
“Pas mundësimit me sukses të shërbimit elektronik, mbi kërkesat e punësimit të shtetasve të huaj në vendin tonë, vjen një lajm tjetër i mirë për bizneset që kërkojnë të rekrutojnë staf nga vende jashtë Shqipërisë. Përmes ‘e-Albania’-s bizneset mund të aplikojnë në çdo kohë për kërkesat e tyre: ‘Vlerësim paraprak për aplikim për ‘Leje Unike’ që konfirmon besueshmërinë e subjektit sa u takon precedentëve, të mëparshëm të punësimit dhe largimit të shtetasve të huaj nga këto subjekte. Përmbushjen e kushteve të punësimit dhe jetesës së punëmarrësve nga ana e subjektit dhe vlerësimin e përfshirjes ose jo, në veprimtari të paligjshme të shtetasve të huaj”, tha Gonxhja.