Një incident i rrezikshëm ka ndodhur në Zyrih të Zvicrës menjëherë pas ndeshjes kualifikuese për Kupën e Botës mes Shqipërisë dhe Serbisë, që përfundoi në barazim 0:0. Mediat ndërkombëtare raportojnë se një i ri shqiptar ka qëlluar në ajër plot nëntë herë me pistoletë, teksa festonte në rrugë me shokët e tij.
Ngjarja ndodhi në zonën e Bürkliplatz, në afërsi të Kongresshaus-it, ku ishin mbledhur dhjetëra makina me flamuj shqiptarë dhe të UÇK-së për të festuar rezultatin e ndeshjes.
Pamjet e incidentit, të publikuara në rrjetin social Snapchat, tregojnë të riun me qeleshe shqiptare duke qëlluar me armë në mes të trafikut. Policia e qytetit të Zyrihut konfirmoi ngjarjen dhe tha se po zhvillohen hetime intensive. “Deri tani nuk ka të lënduar. Po verifikojmë identitetin e personit në fjalë,” deklaroi zëdhënësi Michael Walker.
Autoritetet zvicerane i kanë bërë thirrje publikut që të shmangë veprime të tilla të rrezikshme dhe të bashkëpunojë me policinë për identifikimin e autorit. Ndërkohë, ngjarja ka shkaktuar reagime të shumta edhe në rrjetet sociale, për mënyrën e papërgjegjshme të shprehjes së gëzimit.