Megjithëse numri i shtetasve shqiptarë të burgosur në Greqi është zvogëluar thuajse dy herë brenda një dekade, ata vazhdojnë të mbajnë vendin e parë në listën e të burgosurve të huaj në vend.
Të dhënat u prezantuan në Parlament pas kërkesës së një deputeti të partisë ultra të djathtë ‘Niki’ (Fitorja). Zëvendësministri për Mbrojtjen e Qytetarit, Giannis Lampropoulos, paraqiti statistikat mbi numrin e të burgosurve të huaj në institucionet penitenciare greke, sipas shtetësisë dhe llojit të veprës penale.
Më 29 janar 2026, në burgjet greke ndodheshin 6.939 të burgosur të huaj nga një total prej 13.530 të burgosurish. Nga këta, 1.567 janë shqiptarë, duke i vendosur në krye të listës. Pas tyre renditen të burgosurit me shtetësi pakistaneze (499), egjiptiane (497), sudaneze (328) dhe afgane (303).
Sa i përket llojit të veprave penale, në fund të vitit 2025:
2.462 persona mbaheshin për transportim të emigrantëve të paligjshëm;
1.365 për trafikim të lëndëve narkotike;
602 për vjedhje;
485 për grabitje;
308 për pjesëmarrje në organizatë kriminale;
244 për vrasje me dashje;
132 për përdhunim;
129 për tentativë vrasjeje;
94 për pjesëmarrje në bandë kriminale;
92 për qëndrim të paligjshëm në vend.
Në shënimin shoqërues, zëvendësministri Lampropoulos thekson se Sekretaria e Përgjithshme për Politikën Kundër Krimit bashkëpunon vazhdimisht me Autoritetin Statistikor të Greqisë (ELSTAT), si dhe me organizata evropiane dhe ndërkombëtare, përfshirë EUROSTAT dhe Këshillin e Evropës, për ofrimin e të dhënave statistikore të besueshme dhe të harmonizuara.