Në vijim të deklaratës së ish-drejtoreshës së Teatrit Kombëtar të Operas dhe Baletit, Abigeila Voshtina, ku përmendet edhe emri i Ajola Xoxës, avokatët e bashkëshortes së kryebashkiakut Erion Veliaj kanë reaguar me një deklaratë të ashpër ndaj asaj që e quajnë “shpifje dhe manipulim mediatik”.
Sipas përfaqësuesve ligjorë të znj. Xoxa, deklarata është nxjerrë jashtë kontekstit dhe po përdoret për të ndikuar në opinionin publik në një kohë kur hetimet janë ende në zhvillim. “Çdo pretendim se Ajola Xoxa apo subjektet që ajo administron kanë përfituar fonde publike është i pavërtetë”, thuhet në reagim.
Avokatët sqarojnë se fondi i përmendur nga znj. Voshtina është miratuar nga Këshilli i Ministrave për Ministrinë e Kulturës dhe i është kaluar për administrim TKOB-së, pa asnjë përfshirje të znj. Xoxa në këtë proces. “Asnjë marrëdhënie financiare apo institucionale nuk ekziston mes palëve dhe znj. Xoxa nuk ka përfituar asnjë qindarkë nga ky fond. ZERO!”, theksojnë ata.
Deklarata ngre shqetësimin për publikimin e detajeve nga një proces hetimor ende në zhvillim, duke e cilësuar këtë veprim si “një dhunim të rëndë të parimit të prezumimit të pafajësisë”.
“Znj. Xoxa është një individ nën hetim dhe çdo përpjekje për ta stigmatizuar publikisht përpara se të gjykohet është jo vetëm moralisht e papranueshme, por edhe një shkelje kushtetuese”, përfundon reagimi.