Policia italiane ka goditur një tjetër rrjet trafiku droge, duke çmontuar një bazë logjistike në Funo di Argelato, më 5 nëntor 2025. Operacioni i Skuadrës Fluturuese përfundoi me arrestimin e tre shtetasve shqiptarë dhe sekuestrimin e mbi 21 kilogramëve hashash, si dhe 45,500 eurove në para të gatshme.
Hetimet kishin zbuluar një apartament që shërbente si qendër për përgatitjen dhe shpërndarjen e lëndës narkotike. Rreth orës 16:00, policia vëzhgoi një 20-vjeçar shqiptar që doli nga apartamenti dhe u takua me një 34-vjeçar në një Renault Clio. Ai i dorëzoi bashkëpunëtorit tufa parash dhe mori prej tij një thes të madh të bardhë, të cilin e vendosi në një Fiat 500.
Në atë moment, agjentët ndërhynë. Kontrolli zbuloi rreth 200 blloqe hashashi me peshë totale 20 kg. Në Renault Clio u gjetën 42,500 euro në para të gatshme dhe 1,000 euro të tjera në çantën e 34-vjeçarit.
Gjatë bastisjes së apartamentit, policia arrestoi edhe një 44-vjeçar shqiptar me precedentë penalë për drogë. Brenda banesës u sekuestruan 1 kg marijuanë, rreth 200 gramë hashash dhe materiale për paketim. Të tre u transferuan në burgun “Dozza” të Bolonjës.
Gjykata e Hetimeve Paraprake vendosi masën e sigurisë: dy prej të arrestuarve (të lindur në 1981 dhe 1991) mbeten në paraburgim, ndërsa 20-vjeçari (i lindur në 2005) u vendos në arrest shtëpiak me byzylyk elektronik.
Operacion tjetër në Aeroportin e Bolonjës
Në një veprim të lidhur me hetimin, autoritetet sekuestruan 30 blloqe kanabisi të paketuara në vakum në Aeroportin “Marconi”. Lënda, e fshehur në sendet personale të një pasagjeri, kishte peshë rreth 3 kg dhe u konfirmua si derivat i kanabisit.