Policia italiane ka çmontuar një bandë të ashtuquajtur “skifterë” në qytetin e Veronës, duke arrestuar katër shtetas shqiptarë, të dyshuar për një seri vjedhjesh të mirëorganizuara në banesa dhe biznese. Operacioni u konfirmua këtë të hënë, më 23 dhjetor, nga Prokuroria Publike dhe Policia e Shtetit në Itali.
Të arrestuarit, të moshës nga 25 deri në 28 vjeç, dyshohet se vepronin si një grup i strukturuar kriminal, i cili ishte kthyer në shqetësim për banorët e zonës për shkak të rritjes së ndjeshme të vjedhjeve gjatë muajve nëntor dhe dhjetor.
Hetimet u nisën nga Seksioni i Krimeve kundër Pronës i Policisë së Veronës, pas evidentimit të një modeli të përsëritur veprimi. Agjentët identifikuan një automjet që përdorej në të gjitha rastet, duke arritur në përfundimin se vjedhjet kryheshin nga i njëjti grup.
Sipas policisë, banda vepronte kryesisht në orët e pasdites dhe të mbrëmjes. Dy anëtarë qëndronin në makinë për të kontrolluar zonën, ndërsa dy të tjerë hynin në banesa, të pajisur me mjete speciale për thyerje. Ata ngjiteshin në ballkone, hapnin dritaret me forcë dhe, në komunikim të vazhdueshëm me bashkëpunëtorët përmes radiove, kontrollonin banesat në kërkim të sendeve me vlerë. Në disa raste, ata hapnin edhe kasaforta me mjete të specializuara.
Çdo grabitje zgjaste nga 5 deri në 15 minuta. Më 19 dhjetor, pas kryerjes së dy vjedhjeve në Via Oliosi dhe Via Cristoforo Colombo, njëra prej të cilave përfshinte marrjen e një kasaforte me bizhuteri ari dhe para cash, grupi u ndalua nga policia në zonën e Gardës, pranë vendit ku ata qëndronin përkohësisht.
Gjatë kontrollit të automjetit, policia gjeti kasafortën e vjedhur, bizhuteri, para të gatshme, si edhe mjete të shumta për thyerje, përfshirë një çelës fleksibël me disqe dhe tre radio komunikimi. Bastisja e banesës ku qëndronin çoi në sekuestrimin e sendeve të tjera me vlerë, që dyshohet se janë produkt i grabitjeve të mëparshme.
Të katër të arrestuarit rezultojnë me precedentë penalë për krime kundër pronës. Ata janë dërguar në burgun “Montorio” në Verona dhe ndodhen në dispozicion të prokurorisë, ndërsa hetimet vijojnë për zbardhjen e grabitjeve të tjera të ngjashme.