Një 29-vjeçar në Durrës është arrestuar nga policia, pasi u kap duke kryer vjedhje, ndërkohë që ndodhej nën masën e sigurisë “arrest shtëpie” për një aksident të rëndë me pasojë vdekjen e dy të rejave në vitin 2022. Viktimat e atij aksidenti ishin Roxhesa Klironomi, 24 vjeçe, dhe Silva Gjergji, 26 vjeçe.
Arbër Tivari, së bashku me dy persona të tjerë, dyshohet se kishte planifikuar dhe kryer vjedhje në lokale në zonë. Njëri prej bashkëpunëtorëve të tij, Mario Çelpica, është arrestuar, ndërsa një tjetër person mbetet ende në kërkim.
Gjatë operacionit policor të koduar “Masa”, në lagjen nr. 18 të Durrësit, policia zbuloi se të tre autorët, më 18 nëntor 2025, kishin hyrë gjatë natës në lokalin e një shtetasi me inicialet L. K., nga ku kishin vjedhur sende me vlerë rreth 3 milionë lekë të vjetra.
Në vijim të veprimeve, u gjet edhe automjeti i përdorur për transportimin e sendeve të vjedhura, si dhe veshjet e përdorura nga autorët për t’u maskuar gjatë kryerjes së vjedhjes.
Policia po punon në bashkëpunim me Prokurorinë për identifikimin e bashkëpunëtorit të tretë dhe për të dokumentuar edhe raste të tjera vjedhjesh që dyshohet se janë kryer nga ky grup.
Materialet hetimore janë referuar Prokurorisë së Durrësit për veprat penale “Vjedhje në bashkëpunim” dhe “Largimi i të burgosurit nga vendi i qëndrimit”.