Ambasada e Shteteve të Bashkuara në Dublin ka njoftuar ndryshime të reja në procesin e aplikimit për vizë, që përfshijnë detyrimin për të paraqitur të gjitha emrat e përdoruesve të rrjeteve sociale ose adresat e profileve që aplikantët kanë përdorur gjatë pesë viteve të fundit.
Përveç kësaj, autoritetet amerikane u kërkojnë aplikantëve që profilet e tyre të jenë publike dhe të qasshme. Ky ndryshim, i konfirmuar edhe nga Departamenti i Shtetit javën e kaluar, është cilësuar nga zëvendëskryeministri irlandez Micheál Martin si “masë e tepërt”.
“Unë nuk i miratoj këto masa dhe nuk jam dakord me to,” deklaroi Martin për mediat në Dublin.
Reagime ka pasur edhe nga organizata kombëtare studentore e Irlandës, AMLÉ (ish-USI), e cila paralajmëron se ky “verifikim invaziv” rrezikon të krijojë “klimë frike” tek studentët që synojnë të studiojnë në SHBA.
Kë prek ky ndryshim?
Masat e reja do të zbatohen për të gjithë aplikantët për viza jo-imigruese të kategorive F, M dhe J, që zakonisht përfshijnë studentë dhe pjesëmarrës në programe shkëmbimi kulturor ose akademik.