Pak para skadimit të ultimatumit të Presidentit Trump, Shtetet e Bashkuara dhe Irani janë marrë vesh për një armëpushim dyjavor. Ngushtica e Hormuzit, sipas Iranit, do të hapet për qarkullimin e anijeve me disa kufizime
Presidenti i SHBA-së, Donald Trump, sipas deklaratave të tij, është i gatshëm të pezullojë bombardimet dhe sulmet ndaj Iranit për dy javë, nëse Teherani hap Ngushticën e Hormuzit. Bëhet fjalë për një armëpushim të ndërsjellë, njoftoi Trump në platformën e tij Truth Social. Kryeministri pakistanez Shehbaz Sharif, sipas Trumpit, i kishte kërkuar atij të hiqte dorë nga sulmet e paralajmëruara ndaj centraleve elektrike të Iranit dhe infrastrukturës tjetër, shkroi Trump më tej. Marrëveshja hyn në fuqi menjëherë, sipas Pakistanit.
Zyra e kryeministrit izraelit Benjamin Netanjahu bëri të ditur se: „Armëpushimi dyjavor nuk vlen për Libanin.” Megjithatë, Izraeli mbështet vendimin e Trumpit për të pezulluar sulmet. Përveç hapjes së Ngushticës së Hormuzit, kushti për këtë është që Irani të ndërpresë menjëherë të gjitha sulmet ndaj SHBA-së, Izraelit dhe vendeve të tjera në rajon.
Konfirmim nga Teherani
Sipas një njoftimi, Këshilli Kombëtar i Sigurisë së Iranit ka miratuar armëpushimin. Njëkohësisht, ministri i Jashtëm i Iranit njoftoi hapjen e Ngushticës së Hormuzit. Në koordinim me forcat e armatosura iraniane dhe duke marrë parasysh kufizimet teknike, do të mundësohet qarkullimi i anijeve, shkroi Abbas Araghtschi në një deklaratë. Megjithatë, fillimi i bisedimeve për një marrëveshje afatgjatë nuk nënkupton ende përfundimin e luftës, thuhet në mediat shtetërore iraniane.
Trump i kishte vendosur udhëheqjes iraniane një afat deri në orën 2:00 të natës së kaluar. Më parë, ai kishte dhënë tre herë ultimatume dhe i kishte shtyrë ato çdo herë. Në njoftimin e tij më të fundit, Trump shmangu përcaktimin e një afati konkret për një marrëveshje me Iranin. Ai shkroi vetëm: „Një periudhë prej dy javësh do të mundësojë formulimin dhe përmbylljen përfundimtare të marrëveshjes.”/DW