Sekretari i Shtetit i SHBA-së, Marco Rubio, dhe homologu i tij kinez, Wang Yi, zhvilluan sot një takim që të dyja palët e vlerësuan si pozitiv dhe konstruktiv, në kuadër të punimeve të ASEAN-it në Kuala Lumpur, Malajzi.
Ky është takimi i parë mes diplomatëve të lartë të dy vendeve që nga rikthimi i Donald Trump në Shtëpinë e Bardhë në janar. Të pranishëm në një klimë të ngarkuar me tensione për tregtinë, Tajvanin dhe teknologjinë, Rubio dhe Wang u përpoqën të vendosin një ton më bashkëpunues.
“Ka disa çështje që do të duhet të zgjidhim, gjë që është normale midis vendeve të madhësisë, staturës dhe ndikimit tonë në botë,” deklaroi Rubio pas një ore bisedimesh. “Por, e gjeta këtë takim shumë konstruktiv dhe pozitiv.”
Rubio, i njohur për qëndrimet e tij kritike ndaj Kinës, u shpreh gjithashtu optimist për një takim të mundshëm mes presidentit amerikan Donald Trump dhe presidentit kinez Xi Jinping. “Ekziston një vullnet i fortë nga të dyja palët për ta arritur këtë,” tha ai.
Ministria e Jashtme e Kinës e përshëndeti takimin në një deklaratë zyrtare duke e cilësuar “pozitiv, pragmatik dhe konstruktiv”. Në mënyrë të pazakontë për një komunikatë të tillë, deklarata nuk përmendi asnjë prej pikave të zakonshme të mosmarrëveshjes, përfshirë edhe çështjen e Tajvanit.
Sidoqoftë, Wang Yi theksoi nevojën për dialog me SHBA-në “në kushte të barabarta”, duke lënë të kuptohet se Pekini kërkon respekt të ndërsjellë në negociatat e ardhshme.