Pas humbjes turpëruese 5:0 ndaj Anglisë në kualifikueset për Kupën e Botës, Federata Serbe e Futbollit po shqyrton ndryshimin e vendndodhjes së ndeshjes vendimtare me Shqipërinë. Fillimisht, dueli ishte planifikuar të zhvillohej në stadiumin “Rajko Mitić” në Beograd, por tani po konsiderohet zhvendosja në stadiumin “Doçica” në Leskovc.
Sekretari i përgjithshëm i Federatës Serbe, Branko Radujko, tha për Tanjug se dëshira e tyre është të luajnë në Leskovc, ku kombëtarja ka përgatitur gjithmonë ndeshjet në qetësi dhe ka regjistruar rezultate pozitive. “Kam besim se do të luajmë atje, në Leskovc,” shtoi Radujko.
Stadiumi i Leskovacit ka një kapacitet prej 8,000 vendesh, shumë më modest krahasuar me Marakanën në Beograd, ku vendimi i parë për zhvillimin e ndeshjes ishte planifikuar. Ngjarjet e fundit ndaj Anglisë dhe frika nga përsëritja e incidenteve të mëparshme me tifozët e dhunshëm pritet të sjellin dënime të rënda, duke përfshirë luajtjen e ndeshjeve të ardhshme pa tifozë dhe gjoba të majme në euro.
Ndërkaq, Federata Serbe po punon intensivisht për të marrë miratimin e UEFA-s për ndryshimin e vendndodhjes, duke synuar të krijojë një atmosferë më të kontrollueshme dhe të sigurt për ekipin dhe tifozët.