Deputeti socialist Fatmir Xhafaj solli sot në Kuvend shembuj ndërkombëtarë të hetimeve ndaj liderëve të njohur si Nicolas Sarkozy, François Fillon dhe Benjamin Netanyahu, për të theksuar rëndësinë e pavarësisë së drejtësisë dhe proporcionalitetit në masat e sigurisë.
“Sarkozy u hetua për 5 vite në gjendje të lirë, Fillon u dënua për punësime fiktive, Netanyahu po përballet prej vitesh me akuza për korrupsion, por të gjithë në liri. Askush nuk është mbi ligjin, por rëndësi ka profesionalizmi dhe humanizmi në drejtësi”, — tha Xhafaj.
Ai vuri në dukje se Shqipëria ka një nga raportet më të larta të paraburgosurve në Europë, me 94.6 persona për 100 mijë banorë, ndërsa më shumë se 50% e të burgosurve ndodhen në paraburgim.
“Kohëzgjatja mesatare e paraburgimit është 253 ditë, ndërsa për gjykatat speciale shkon mbi 600 ditë. Këto tejkalojnë standardet ndërkombëtare dhe kërkojnë reflektim urgjent,” — shtoi ai.
Xhafaj theksoi se reforma në drejtësi ka ndryshuar rrënjësisht sistemin penal, por kërkoi analizë të thelluar mbi masat e sigurisë dhe rishikim të mentalitetit institucional.
Sipas tij, problemi nuk qëndron vetëm te prokurorët, por edhe te gjykatat, të cilat duhet të garantojnë proces të rregullt ligjor dhe të shmangin vendimmarrjet e tepruara për “arrest me burg”.
Në fund të fjalës, Xhafaj rikujtoi një mesazh nga një ish-prokuror i përgjithshëm amerikan:
“Prokurori nuk është për të fituar çështjen, por për të bërë drejtësi. Ai duhet të kërkojë të vërtetën dhe t’i shërbejë vetëm ligjit.”