Publikimi i librit “Snajperistët e fundjavës” nga gazetari italian Ezio Gavazzeni ka rikthyer në vëmendje një nga akuzat më të rënda të periudhës së luftës në Bosnje, të njohur si “Sarajevo Safari” – një praktikë e pretenduar ku civilët në Sarajeva shënjestroheshin si objektiva për “argëtim”.
Sipas hetimeve të publikuara edhe nga Der Spiegel, dyshohet për përfshirjen e figurave të rëndësishme, përfshirë ish-shefin e shërbimit sekret serb Jovica Stanišić, si dhe pretendime për lidhje të mundshme me presidentin aktual të Serbisë Aleksandar Vučić.
Rreth 30 vjet pas rrethimit të Sarajevës, Prokuroria e Milanos po shqyrton akuza se shtetas të pasur nga Evropa Perëndimore udhëtonin drejt zonave përreth qytetit për të qëlluar mbi civilë. Sipas dëshmive, viktimat më të kërkuara ishin më të pambrojturit, përfshirë gratë shtatzëna dhe fëmijët.
Gjyqtari Guido Salvini ka deklaruar se bëhej fjalë për një sistem të organizuar mirë, ku dhjetëra apo qindra persona udhëtonin nga Beogradi drejt Sarajevës me mjete të ndryshme, përfshirë helikopterë dhe automjete terreni.
Hetimet sugjerojnë se rreth 230 shtetas nga vende si Italia, Franca, Belgjika dhe Zvicra paguanin shuma që arrinin deri në 200 mijë marka gjermane për të marrë pjesë në këto “fundjava vrasjesh”.
Një nga rastet më tronditëse mbetet ai i foshnjës Irina Qishic, e vrarë vetëm pak ditë pas ditëlindjes së parë, një nga rreth 1,600 fëmijët që humbën jetën gjatë rrethimit.
Dëshmitë e ish-luftëtarëve dhe burime të tjera flasin për një praktikë të njohur mes forcave në terren, ku paralajmërohej ardhja e “snajperistëve të fundjavës”. Ndërkohë, gazetari kroat Domagoj Margetić ka ngritur akuza për përfshirjen e figurave të ndryshme serbe në këtë aktivitet.
Raportime të tjera përmendin edhe emra si Vojislav Šešelj dhe Slavko Aleksić, ndërsa për organizimin logjistik përmendet Dragoslav Bokan.
Deputeti boshnjak Zlatko Miletić ka deklaruar se është i bindur se këto aktivitete janë organizuar nga shërbimet serbe të sigurisë, duke shtuar se vdekja e disa dëshmitarëve kyç në rrethana të dyshimta ka penguar zbardhjen e plotë të së vërtetës.