Prokuroria e Milanos ka nisur një hetim të gjerë ndaj disa shtetasve italianë, të cilët dyshohet se kanë paguar anëtarë të ushtrisë së Bosnjës dhe Serbisë gjatë viteve të luftës në Ballkan, për të udhëtuar në Sarajevë dhe për të vrarë civilë gjatë rrethimit famëkeq të qytetit në vitet 1990.
Sipas raportimit të The Guardian, hetuesit italianë po verifikojnë akuzat se këta persona, të cilët janë quajtur “turistë snajperistë”, kanë paguar shuma të mëdha parash për t’u lejuar të qëllonin mbi qytetarë të pafajshëm nga kodrat përreth kryeqytetit boshnjak, thjesht për “kënaqësi” — një akt barbar që përshkruhet si “safari njerëzor”.
Rrethimi i Sarajevës, që zgjati nga viti 1992 deri në vitin 1996, është një nga episodet më tragjike të luftës në ish-Jugosllavi. Më shumë se 10,000 njerëz u vranë, mes tyre qindra fëmijë, nën breshërinë e snajperëve dhe bombardimeve të pandërprera. Sarajevës, e rrethuar nga male, iu bllokua çdo dalje, duke u kthyer në një arenë vdekjeje për popullsinë e saj.
Prokurorët italianë, nën drejtimin e Alessandro Gobbi-t, po hetojnë për “vrasje të qëllimshme të rënduar nga mizoria dhe motivet e ulëta”. Hetimi nisi pas një kallëzimi të bërë nga shkrimtari milanez Ezio Gavazzeni, i cili ka mbledhur prova dhe dëshmi për këtë fenomen të errët, si dhe nga një raport i dërguar autoriteteve italiane nga Benjamina Karić, ish-kryetare e bashkisë së Sarajevës.
Gavazzeni ka deklaruar se ishte në dijeni të raportimeve të hershme të mediave italiane për “turistët snajperistë”, por vendosi të thellohej në hetim pasi pa dokumentarin “Sarajevo Safari” të regjisorit slloven Miran Zupanič në vitin 2022, i cili solli dëshmi tronditëse mbi pjesëmarrjen e huajve në krime lufte për motive argëtimi.
Nëse provat konfirmohen, rasti mund të hapë një kapitull të ri dramatik në historinë e përgjegjësive ndërkombëtare për mizoritë e luftës në ish-Jugosllavi.